Фото:gov.kz
Өткен аптада қылмыстық істер жөніндегі мамандандырылған ауданаралық сот ірі алаяқтық ісі бойынша үкім шығарды.
Алматы, NEGE.
Істе бірнеше эпизод бар. Алайда бір іске ерекше көзіміз түсті – сотталушы Сыбайлас жемқорлыққа қарсы қызмет жүргізіп жатқан тергеуді тоқтатуға көмектесуге уәде берген. Ол үшін Антикор басшылығына 40 мың доллар төлеу керек болған.
2022 жылы Антикор Жаңақорған білім бөлімінің басшысынан бюджет қаржысын жымқырды деп күдіктенген. Күдікке ілінген шенеуніктің ағасы Ибрагимов істі жабуға көмектесетін адамды іздей бастайды. Іс материалдарына сәйкес, оны 40 жастағы Жәнібек Бөкеновпен таныстырған, ол өзін Сыбайлас жемқорлыққа қарсы қызметтің қызметкерімін деп көрсетіп, Олжас Бектеновпен (сол кездегі Сыбайлас жемқорлыққа қарсы іс-қимыл агенттігінің төрағасы) жақсы қарым-қатынаста екенін, Асхат Жұмағали күйеу баласы болып келетінін айтқан. Сөзі нанымды болу үшін Бөкенов Ибрагимовпен бірге Сыбайлас жемқорлыққа қарсы қызметтің ғимаратына дейін барып, онда 20 минут болып, қайта шыққанда басшылықпен келіскенін айтқан.
«Бөкенов Ж.Б. сыбайлас жемқорлыққа қарсы қызмет басшылығымен ағасына қатысты қылмыстық істі тоқтатуға келіскенін хабарлаған. Ол үшін Сыбайлас жемқорлыққа қарсы қызметтің басшысы О.А.Бектеновке 40 000 АҚШ долларын беруі тиіс екенін айтқан», – делінген іс материалында.
2022 жылдың 20 желтоқсанында Ибрагимов сұралған соманы аударған. Сонымен қатар, Бөкенов оны 2023 жылдың сәуір айына дейін алдауды жалғастырып, мейрамхананың шотынан бастап кепілге қоюға, сараптама жүргізуге және бұлтартпау шарасын өзгертуге дейін түрлі шығындарды төлеймін деген желеумен тағы 46,4 миллион теңгені жымқырған. Алайда бұл Ибрагимовтың бауырына көмектеспейді, сот шенеунікті 8 жылға бас бостандығынан айырды.
Сотталушы өз кінәсін мойындамайды. Ол өзін «Антикордың» қызметкерімін деп таныстырмағанын, ешкімді пара беруге итермелемегенін және ешкімге ештеңе уәде етпегенін алға тартады. Алайда, іс материалдарының ішінде 2023 жылдың 13 сәуірінде жасалған аудиожазба бар. Онда Ибрагимов Бөкеновке: «Сен оны Бектеновке апарған жоқсың ба?» деп сұрайды, сотталушы: «Тікелей емес, адамдар арқылы жібердім» деп жауап береді.
Бөкеновтің мүлкі – Қосшыдағы пәтері мен көлігі тәркіленіп, 14 жыл 8 айға бас бостандығынан айырылды.
Оның үстіне, Бөкеновтің Антикорда жұмыс істемейтіні және Бектеновпен таныс емес екені белгілі болды. Іс материалдарынан анықталғандай, ол қарапайым күзетші болып шықты.
159 рет оқылды
